Die sokkerkaartjies se prys kan maar afkom, daar’s nou geen manier meer dat ek in ‘n stadion gaan sokker kyk nie. Behalwe dat ek nie juis sportgeesdriftig is nie – ek kyk ook nie rugby of krieket nie – sou ‘n sessie se sokkerkyk in ‘n stadion nogal lekker gewees het. Lekker uitgaan en gees vang en sulke goed.
Maar toe kom ek agter in die stadions word net Budweiser verkoop. Kyk, my bier is my bier. Ek hou van my bier. As daar ‘n geleentheid is vir bier drink, want koue bier kielie die keel lekker op geleenthede, dan is ek eerste in die ry.
Ek probeer mos ‘n Budweiser, want ek is mos ook so bietjie oopkop.
Sorry, slegs 2 uit 10.
Die 2 punte is gegee omdat iemand darem iewers iets probeer het. ‘n Bottel ontwerp het en ‘n etiket opgeplak het.
Ek sal maar tydens die sokker ‘n geleentheid skep met ‘n groot braaivleisvuur, by iemand wat DSTV het, en ‘n dosyn yskoue Zamaleks. Of dalk sommer by een van die kuierplekke, ver, buitekant ‘n stadion en die ronde bal op ‘n groot flat-screen volg.